Оғози барномаи даъват ба Китобхона

Шуъбаи маркетинг ва менеҷменти фаъолияти китобдорӣ барномаи «Даъват ба китобхона»-ро, ки тарҳи он соли гузашта роҳандозӣ шуда буд, дар Наврӯзи имсол аз мактаби таҳсилоти умумии рақами 8-и пойтахт оғоз кард.
Баъд аз зуҳри имрӯз гуруҳе аз кормандони шуъба вориди ин мактаб шуданд ва дар мулоқот бо донишомӯзону устодон онҳоро бо Китобхонаи миллӣ ошно карданд ва дар фарҷом даъват намуданд, ки аз ин боргоҳи маърифат дидан кунанд ва аз он ташнагии маънавӣ бикананд. 
    Ҷонишини директори мактаби номбурда Гуландом Амонова аз ин иқдом пуштибонӣ кард ва бо изҳори миннатдорӣ аз суҳбати озоди кормандони китобхона бо хонандагону устодон иброз дошт, ки баъди мактаб дуюмин ҷойе, ки хонанда бояд интихоб кунад, ин китобхона бошад.
Дар мулоқот кормандони шуъба ба хонандагон дар бораи имкониятҳои Китобхонаи миллӣ, толорҳои хониш, давраҳои омӯзиши забонҳои гуногуни хориҷӣ ва хизматрасониҳо дар он нақл карданд ва барои ҳар ширкаткунандаи ин мулоқот китобчаи раҳнамо тақдим намуданд.    
Устодоне, ки дар мулоқот ширкат доштанд, гуфтанд, ки дар оянда дар соатҳои тарбиявӣ хонандагонро барои рафтан ба Китобхонаи миллӣ ташвиқ хоҳанд кард, ҳамчунин онҳоро аз имкониятҳои васеъи ин маъхази маърифат хабар хоҳанд дод.
Барномаи “Даъват ба китобхона” рӯзҳои оянда идома хоҳад кард.