Оғози омӯзиш барои кормандони китобхонаи илмии Донишгоҳи Миллии Тоҷикистон

  Гурӯҳе аз  кормандони китобхонаи  илмии Донишгоҳи  миллии  Тоҷикистон ба як давраи омӯзишии 56-соата тибқи барномаи таълимии “Фаъолияти китобдорӣ-иттилоотӣ” ҷалб шуданд. Ин давраи омӯзишӣ дар Китобхонаи миллӣ субҳи имрӯз оғоз шуд ва қарор аст то 4-уми октябри соли равон идома кунад.

  Дар ин давра шунавандагон бо  КМТ, шуъбаи такмили адабиёт, шуъбаи коркарди адабиёт, шуъбаи илмӣ-таҳқиқотӣ, шуъбаи библиография миллӣ, шуъбаи хизматрасонии библиографӣ, шуъбаи хизматрасонӣ ба муштариён, шуъбаи адабиёти хориҷӣ, шуъбаи дастхатҳои Шарқ ва китобҳои нодир, шуъбаи рисолаҳои илмӣ ва шуъбаи феҳристнигорӣ ошно мешаванд.

  Омўзиши  ин  барнома  ба китобдорон  имкон  медиҳад, ки  оид  ба таърих, давраҳои инкишоф, мазмуну мундариҷаи фонд, фаъолияти  шуъбаву  бахшҳо,  сохтори  дастгоҳи  маълумотдиҳӣ – библиографӣ, низоми худкори  равандҳои  китобдорӣ – иттилоотӣ, фаъолияти  илмӣ – методӣ,   нашрӣ  ва  таъмиру  тармими  ҳуҷҷатҳо   тассавурот  пайдо намоянд.

  Солҳои охир  ҷиҳати  ҷалби  ҷомеа  ба китобу  китобхонӣ  ва  беҳбуди кору   фаъолияти  китобхонаҳои  мамлакат тадбирҳои  мушаххас  андешида мешаванд. Қабул  шудани қонунҳои  Ҷумҳурии Тоҷикистон  «Дар  бораи  фаъолияти  китобдорӣ »,  «Дар бораи  матбуот ва дигар воситаҳои  ахбори  омма», «Дар бораи  нусхаи  ҳатмии ҳуҷҷатҳо» , «Барномаи  рушди фаъолияти  китобдорӣ  дар Ҷумҳурии  Тоҷикистон   барои солҳои 2015- 2020» роҳро барои омӯзишҳои фарогир боз карданд.

 Китобдори  имрўза бояд  ба  ҳайси  иттиллотсоз ,  иттиллотрасон  (интиқолдиҳандаи  иттиллот ), иттилоотшинос, маъмури  бойгонии  иттилоот,менҷери  воридоту  содироти  иттилоот , барномарез  ифои  вазифа намояд.

  Иҷрои ҳар як  аз ин вазифаҳо  аз  китобдор  дониши  мукаммалу пайвастаи  тахассусӣ, масъулияти   баланди  касбиро  тақозо  намуда, водор  месозад, ки  қабл аз  ҳама  истифодаи  технологияи  навро хуб донад.

  Меҳрангез Муҳаббатова