Китоби нав. Муқим Воҳид: “Лолае дар пайроҳаи бабр”

Ишқ  чист? Чӣ  муаммоест, чӣ сарафканист ба  қаъри дунёи  дарду алам, ранҷу  озорҳо? Ошиқ  кист  ва  дар  роҳи  мурод ба  чӣ ҷонфидоиҳо  қодир  аст?  Ба ин суолҳо хонандаи  азиз   аз  қиссаҳои  нави Муқим Воҳид ба андозае  бохабар  хоҳад  гашт.

  Муқим  Воҳид 9 – уми апрели соли 1950 дар  шаҳри  Хуҷанд  дар  оилаи  зиёӣ   таваллуд  шудааст. Баъди  хатми  мактаби  миёна соли 1967  ба факултаи  таъриху  филологияи  Донишкадаи  давлатии   педагогии шаҳри  Хуҷанд  дохил  гашта, онро  соли  1971 бо  тахассуси   омўзгори   фанни  забон  ва  адабиёти  тоҷик  хатм  намудааст.

 Фаъолияти  омўзгориро   аз  моҳи  августи  соли  1971 дар  мактаби миёнаи № 1 шаҳраки  Табашар  (алҳол  Истиқлол) оғоз  намудааст. Аз моҳи  ноябри  соли 1972 то даъват шудан ба хизмати ҳарбӣ  дар идораи  рўзномаи  вилоятии  «Ҳақиқати  Ленинобод» чун мусаҳҳеҳ  адои  вазифа намудааст. Аз  ҳамин  сол  фаъолияти   адабии  вай  оғоз  гашта, ҳикояҳояш  дар  рўзномаҳои  «Ҳақиқати Ленинобод»,  « Ленинабадская  правда», « Бо  роҳи Ленинӣ», « Маориф  ва  маданият» ва « Газетаи  муалимон» борҳо  рўйи чопро  дидаанд.

     Аз  соли  1974 боз  ба фаъолияти  омўзгорӣ  пардохта, минбаъд, дар мактаби  миёнаи № 9 – и шаҳри  Қайроққум  ( Гулистон) ва  аз  моҳи  сентябри соли  1989  дар  мактаби  миёнаи  №  8- шаҳри Хуҷанд  касби  омўзгориро давом  додааст. Дар  ин  муддат  мунтазам ҳикоя, мақола ва  очеркояш  дар  рўзномаю  маҷаллаҳо  чоп  шудаанд. Соли  1991 повести  нахустини  ў «Оби зулол» аз ҷониби  нашриёти  « Адиб» чоп   шудааст.

  Муҳим  Воҳид  аз  соли  1992 то  алҳол  дар  Литсейи  физикӣ – математики  №1, ба номи  академик  М. Осимии шаҳри  Хуҷанд бо  касби  омўзгорӣ  машғул  аст.  Ҳамзамон  солҳои  зиёд  ў  масъули  филиали  хуҷандии Академияи хурдии  илмҳои  Тоҷикистон  буд.

Соли 2001  ба  гирифтани  нишони Аълочии маорифи  Тоҷикистон  мушарраф  гашт.

Соли 2003  китоби  дуюмаш «Ашки ишқ» манзури  хонандагон  гардид. Соли 2008 аз ҷониби  нашриёти  «Ношир» маҷмўаи  қиссаву  ҳикояҳояш  «Дунёи  бевафо» ва  соли 2014 китоби «Ёд макун, ашк марез»( нашриёти  «Анис») аз чоп  баромад.

Муқим  Воҳид соли  2013 барои  китоби  «Дунёи  бевафо» сазовори ҷоизаи адабии ба номи Раҳим Ҷалил шудааст.

Аз соли  1994 узви  ИН  Тоҷикистон  мебошад.

Китоби “Лолае  дар  пайроҳаи  бабр” – ро шумо метавонед дар Китобхонаи миллӣ мутолиа намоед.

 Меҳрангез Муҳаббатова,

  Маркази такмили ихтисос