Сухан пирона гӯям дар ҷавонӣ...

Раҳмат Назрӣ аз наслест, ки солҳои 70 ба арсаи адабиёт қадам гузоштаанд. Солҳое, ки дасти ҷавонон адибони машҳуре чун Мирзо Турсунзодаву Боқӣ Раҳимзода мегирифтанд. Ва аввалин маҷмуъаи шеърии Раҳмат Назрӣ ҳам соли 1973 бо сарсухани Боқӣ Раҳимзода чоп шудааст.

РАҲМАТ НАЗРӢ 15 – уми октябри соли 1951 дар шаҳри Кӯлоб ба ҷаҳон омадааст. Соли 1968 мактаби миёнаи №7 зодгоҳаш ва соли 1973 шуъбаи рӯзноманигории факултаи филологияи тоҷики Донишгоҳи давлатии Тоҷикистон ба номи В.И.Ленинро ба итмом расонидааст.Чанде мухбири рӯзномаи «Маориф ва маданият» (1973-1979), коргузори Дафтари тарғиби адабиёти Иттифоқи нависандагон (1979-1983), мудири шуъба ва муовини сармуҳаррири ҳафтаномаи «Адабиёт ва санъат» (1983-1989), мушовири назми Иттифоқи нависандагон (1989-2002) будааст. Аз соли 2002 то имрӯз котиби масъули Кумитаи Ҷоизаи давлатии Тоҷикистон ба номи Абӯабдуллоҳи Рӯдакӣ дар соҳаи адабиёт, санъат ва меъмории назди Ҳукумати Ҷумҳурии Тоҷикистон, узви Садорат ва Раёсати Иттифоқи нависандагони Тоҷикистон мебошад.

Нахустин чакидаи хомааш ҳанӯз овони мактабхонӣ дар маҷаллаи «Машъал» чоп шудааст. Баъдан шеърҳои навмашқонаи ӯ дар рӯзномаҳои «Маориф ва маданият» ва «Комсомоли Тоҷикистон» дарҷ гардидаанд.

Солҳои ҷавонӣ дар Фестивалҳои VIII, IX, X умумииттифоқии шоирони ҷавон (Ашқобод 1975, Полтава 1978, Владивосток 1985) ва Машварати VI адибони Иттиҳоди Шӯравӣ ва мамлакатҳои сотсиалистӣ (Москва 1979) ширкат варзидааст.

Соли 1977 маҷмӯаи нахустини шеърҳои ӯ «Барги сабз» бо фотиҳаномаи устод Боқӣ Раҳимзода ба табъ расидааст. Сипас маҷмӯаҳои ашъораш «Ситораи рӯз» (1982), «Лолаи оташ» (1984), «Сарнавишт» (1988), «Меҳроб» (1991), «Ҳафтранг» (2002), «Садои хомӯшӣ» (2006), «Ситораборон» (2011), «Чилчароғ» (2011), «Ширмаҳтоб» (2012), «Ширинкома» (2012), «Шилшила» (2013), «Дида ба дида» (2014) интишор ёфтаанд. Намунаҳои аъшораш ба чандин баёзҳо ва китобҳои дарсӣ ворид шудаанд.

Соли 2004 маҷмӯаи ашъораш «Сояи танҳоӣ» дар Ҷумҳурии Исломии Эрон, 2011 «То боздид, эй офтоб!» дар Тоҷикистон бо ҳуруфи ниёкон аз чоп баромадаанд. Ҳамчунин намунаҳое аз шеърҳои ӯ дар баёзҳои эронии «Хуршедҳои гумшуда», «Боғи бисёрдарахт», «Эрон дар шеъри муосири тоҷик» ва маҷаллаҳои эронии «Кайҳони фарҳангӣ», «Симурғ», «Шеър», «Оянда», «Бухоро», «Рӯдакӣ», «Оинаи зиндагӣ» ва ғайра ба табъ расидаанд.
Соли 1988 барои китоби «Сарнавишт» сазовори Ҷоизаи комсомоли Тоҷикистон, соли 1993 барои китоби «Меҳроб» шоистаи Ҷоизаи адабии ба номи Мирзо Турсунзода, соли 2000 барои силсилаи дубайтиҳои «Хирмани моҳ» арзандаи Ҷоизаи давлатии Тоҷикистон ба номи Абӯабдуллоҳи Рӯдакӣ ва соли 2003 шарафёби унвони Шоири халқии Тоҷикистон гардидааст.
Борҳо дар озмунҳои ватаниву байналмилалии шеър ғолиб омадааст.
Як силсила шеърҳои шоир ба забонҳои русӣ, инглисӣ, олмонӣ, арабӣ, туркӣ, украинӣ, булғорӣ, арманӣ, аварӣ, латишӣ, ӯзбекӣ, қазоқӣ, қирғизӣ ва ғ. тарҷума шудаанд.
Ба шеърҳои алоҳидаи ӯ бастакорони маъруфи кишвар оҳанг бастаанд. Се қартаи овоз, ки «Сурудҳо бар ашъори Раҳмат Назрӣ» ном дорад, солҳои 1985, 1986, 1990 аз ҷониби фирмаи «Мелодия»-и Тошканд интишор ёфтааст.

Аз соли 1979 узви Иттифоқи нависандагони Тоҷикистон аст.

Суроғаи ҳамешагии ин мақола ин ҷост: РАҲМАТ НАЗРӢ

Аз Раҳмат Назрӣ ва дар бораи ӯ дар Китобхонаи миллӣ метавонед ин матолибро бихонед:

  • Барги сабз: Маҷмўаи шеърҳо. – Душанбе: Ирфон, 1977. – 64с.
  • Ситораи рўз: Маҷмўаи шеърҳо. –Душанбе: Ирфон, 1982. –79 с.
  • Лолаи оташ: Маҷмўаи шеърҳо. –Душанбе: Ирфон, 1984. – 144 с.
  • Сарнавишт: Шеърҳо. – Душанбе: Адиб, 1988. – 192 с.
  • Меҳроб: Шеърҳо. –Душанбе: Адиб, 1991. –192с.
  • Соҳибватан: Шеър // Садои Шарқ. – 1975. –  №3. – С.77.
  • Беватан; Камолот: Шеърҳо // Маориф ва маданият. – 1975. – 24 май.
  • Баҳри Норак: Шеър // Садои Шарқ. – 1976. – №1. – С.89.
  • Ҳавои деҳ; Кишт; Дар сари роҳ: Шеърҳо // Комсомоли Тоҷикистон. –1976. – 29 август.
  • Эй Ватан…; Гармо: Шеърҳо // Садои Шарқ. – 1977. – №5. – С.33.
  • Ҳамрози дарё; Ағбаи Шаршар: Шеърҳо  // Маориф ва маданият. – 1978. –18 май.
  • Кисабур; Ишқи аввал; Кўчи Яғноб; Роҳи сафед; Арғушти занг; Шаби маҳтоб; Дуои модар; Бахти рўшан: Шеърҳо  // Адабиёт ва санъат. – 1989. – 6 июл.
  • Шумо; Эй шумо!; Ҳадиси модар; Чилча; Достон; Ойинаи кўр…: Шеърҳо // Адабиёт ва санъат. – 2012. – 24 май.

Дар бораи адиб:

  • Азимӣ, О. Дандони шир: Оид ба эҷодиёти шоир Раҳмат Назрӣ // Адабиёт ва санъат. – 1993. – 5 август.
  • Аҳтамзода, Ш. Дар ҳошияи «Меҳроб»: Дар бораи китоби Раҳмат Назрӣ «Меҳроб» ва оиди пешниҳоди он ба ҷоизаи ба номи Турсунзода // Адабиёт ва санъат. – 1993. – 19 август.
  • Убайдулло, Ш. Канори ғам кашида: Шеър бахшида барои дўстам  Раҳмат Назрӣ  // Боҷу хироҷ. – 2011. – 30 октябр.
  • Муродӣ, А. Шеърпайванди «Омўзгор»: Оиди фаъолияти Шоири халқии Тоҷикистон Раҳмат Назрӣ // Омўзгор. – 2011. – 14 октябр.
  • Саидзода, Ҷ. Сухан пирона гўям дар ҷавонӣ: Оиди фаъолият ва эҷодиёти Раҳмат Назрӣ // Адабиёт ва санъат. – 2012. – 26 июл.
  • Собир, Б. Як лес ангубин: Порае аз эҷодиёти шоир Раҳмат Назрӣ // Адабиёт ва санъат. – 2015. – 4 июн.

Таҳияи Саодат Қодирова,
корманди шуъбаи
библиографияи миллӣ