Даргоҳи умеду кушоиш

Бо Далер Раҳимов замоне ошно шудем, ки саргарми мутолиа буд. Мегуфт чун довталаб аст ва аз роҳи дур ба нияти донишҷӯ шудан омадааст, зиёд мутолиа мекунад, то ба орзуяш расад. Хушбахтона, кам нестанд ҷавононе, ки аз ноҳияҳои дурдаст бо орзуву ҳавасҳои зиёд ба пойтахт меоянд ва талош мекунанд дар ҳамин шаҳр дари саодати донишҷӯ шуданро ба рӯи худ боз кунанд. Аммо ин кори осону содае нест. Бояд хеле мутолиа кард, то орзу амалӣ гардид. Ва Китобхонаи миллӣ ин гуна шароитҳои хубро дорад.

Далер Раҳимов, сокини шаҳри Конибодом, мегӯяд яке аз хонандагони фаъоли китобхонаи ба номи Абдураҳмони Ҷоми шаҳри Конибодом мебошад. Ў  бори нахуст ба Китобхонаи миллӣ ташриф овардааст ва ҳангоми суҳбат чунин ибрози андеша намуд, ки «Ҳангоми дар синфи 8-ум таҳсил намуданам меҳрам ба китобхонӣ беандоза гардид. Шурўъ аз ҳамон сол аъзои китобхонаи маркази шаҳри Конибодом гардидам ва он китобҳоеро, ки ба таъби дилам буданд, ҳамеша дар вақтҳои холиам мутолиа мекардам.

Айни замон довталаб ҳастам ва мехоҳам таҳсиламро дар шаҳри Душанбе идома диҳам, бинобар ин ба Китобхонаи миллӣ омадам,  то аъзои ин китобхонаи зебову дар минтақа беназир гардам. Ният дорам, ки китобҳоеро, ки ба соҳаи мо дахлдор аст дар ин ҷо дарстрас ва мутолиа намуда, савияи дониши худро баланд бардорам”.

Далер Раҳимов бо Китобхона зуд ошно шудааст ва мегӯяд “биси хушнудист, ки Китобхонаи миллӣ дорои 25 толори хониш буда, ҳар як толори хониш ба соҳаи худ китобу маводҳо доштааст, ки барои мо хонандагон хеле писанд омад. Инчунин ман аз толори хониши электронӣ дидан намудам, маълум гардид, ки тамоми шароитҳо дар ин толор муҳайё гардидааст, ҳамзамон Китобхонаи миллӣ хеле бароҳат ва замонавӣ аст. Хушбахт аз онам, ки имрўз аъзои китобхонаи бошукуҳи кишвар гардидам».    

Моҳира Раҷабова,
Шуъбаи тарғиб ва баргузории
чорабиниҳои фарҳангӣ.