Саодати миллат дар Ваҳдат аст

Чунин ном дошт Конфронси илмӣ –оммавӣ, ки имрӯз  бахшида ба 20 – умин солгарди Ваҳдати миллӣ баргузор шуд.

Конфронсро бо суханони муқаддимавӣ Директори  Китобхонаи  миллии Тоҷикистон, профессор Сайфиддин Назарзода ифтитоҳ кард. Вай ширкаткунандагонро ба муносибати ин санаи муҳим ва сарнавиштсоз табрик намуд. Сайфиддин Назарзода аз бист соли гузашта ёд кард ва гуфт 27-уми июни соли 1997 имзои Созишномаи сулҳ дар Маскав ба ҷанги бемаъниви дохилӣ дар кишвар поён дод. Аз он замон бист сол сипарӣ шуд ва фазои сулҳу оштӣ ба Тоҷикистон субот овард, кишвари ҷангзада рушд кард.
Директори Китобхонаи миллӣ дар бахши дигари суханрониаш таъкид кард, ки ин санади ҳамдигарфаҳмӣ ба осонӣ имзо нашуд, барои ин лозим омад, ки ҳукумат бо мухолифонаш ба хотири наҷоти миллату давлат содҳо музокира кунад. “Баъди музокироти тўлонӣ ба хотири ҳифзи якпорчагии марзу буми кишвар, таъмини сулҳу субот, сарҷамъии миллат ва зиндагии ороми сокинони мамлакат Созишномаи умумии истиқрори сулҳ ва ризоияти миллӣ дар Тоҷикистон ба имзо расид, ки ин санади муҳим дар таърихи навини халқамон аз ҷумлаи асноди сарнавиштсоз ба ҳисоб меравад. Зеро маҳз ҳамин санади таърихӣ ба ҷанги таҳмилии шаҳрвандӣ хотима бахшида, барои оғози рушди давлатдории Тоҷикистони соҳибистиқлол ва ҳаёти орому осудаи мардуми он шароити мусоид фароҳам овард. Дар ин рўзи саид ҳар як фарди Тоҷикистон бори дигар амиқан дарк менамояд, ки ваҳдати миллӣ барои мардуми кишвари мо то чӣ андоза азизу муқаддас мебошад”,-гуфт ӯ.    
Корманди Шоистаи Ҷумҳурии Тоҷикистон, доктори илмҳои филология, академики Академияи Улуми иҷтимоӣ – педагогии Русия, нависанда, узви Иттифоқи нависандагони Тоҷикистон Қурбон Восеъ дар мавзӯи “Раванди Ваҳдат ва назарияи он” сӯҳбати тӯлонӣ дошт.
Қурбон Восеъ аз ҷумла гуфт: “Ваҳдат бузургтарин дастоварди Истиқлолият ба ҳисоб меравад. Фикр мекунам, он чизе, ки мо дидем, он чизе, ки ҳар хонадони мо оромона зиндагӣ мекунад, ин худ самараи Истиқлолияту самараи Ваҳдат аст. Замоне ки ҷангҳо буданд, бародар бародарро ба хонааш роҳ намедод. Созиш ин бузургтарин дастоварди Истиқлолият аст. Роҳе, ки марди наҷиб Пешвои миллат муҳтарам Эмомалӣ Раҳмон пеш гирифтааст, роҳи бурдборона ва ҷомеасозӣ аст”.
Дар поёни конфронс миёни ширкаткунандагон табодули афкор дар мавзуъи сулҳу субот ва Ваҳдати миллӣ баргузор шуд.
Мавриди тазаккур аст, ки дар чорабинӣ беш аз 100  нафар устодону донишҷӯёни мактабҳои олии шаҳри Душанбе иштирок намуданд.
Дар охир нависанда Қурбон Восеъ панҷ китоби худ, аз ҷумла ”Сарчашмаҳои адабиёти ҷавонмардӣ”, “Маромгӯии Ваҳдат ва Истиқлолият”, “Садафи Ваҳдат- Пешвои миллат”-ро ба Китобхонаи миллӣ тақдим науд.  

Фарзонаи МИРЗО