Этикаи касбии китобдорон
Мутахассиси соҳа Ситораи Абдумуминзода бахшида ба мавзуъи мазкур таваҷҷуҳи бештар зоҳир намуда китоби «Этикаи касбии китобдор»-ро нашр намудааст. Китоб барои донишҷуён, омўзгорон ва кули мутахассисони риштаи китобдорию итилоърасонӣ хеле муфид хоҳад буд.
Ташаккули одоби касбии китобдори яке аз мавзуҳои муҳими назарияи китобхонашиносӣ ба шумор меравад. Пешрафти кори китобхона пеш аз ҳама аз муносибати китобдор бо хонанда вобаста аст. Китобдор дар муҳити китобхона ниҳоят шахси масъулятнок аст ва бояд, ки ба ин масъала ниҳоят ҷиддӣ муносибат кард. Раванди хизматрасонӣ, мақоми китобхона дар ҷомеа аз одобу рафтори касбии китобдорон вобастагӣ дорад.
Ҳанўз аз замонҳои қадим китобдорон дар китобхонаҳо вазифаҳои муҳим-дар шароити хуб нигоҳдоштани китобҳо, рўйнавис намудани китобҳои нодир, ба истифодабарандагон расонидани онҳо ва ѓайраро ба зима доштанд ва ба ин восита дар инкишофи илми китобдорӣ саҳми арзандаи худро гузоштаанд.
Тавассути таҳияи назарияи хусусиятҳои ташаккули одоби касбии китобдорон, нақши педагогии онҳо дар китобхонаҳо муайян намудани самтҳои асосии ташаккули одоби касбии китобдорон ҳам омили асосии сатҳи баланди хизматрасонӣ дар китобхона ва баланд бардоштани маънавиёти ҷомеа аст.
Доир ба таҳқиқи мавзуй мазкур олимони зиёди ватанию хориҷӣ таҳқиқоти арзишманд анҷом доданд. Қобили зикр аст, ки оид ба ин масъала Андреевна С., Алтухова Г., Александрова И., Акимова В., Сикорский Н. Ванеев А. ва дигарон дар таҳқиқоташон изҳори назар кардаанд.
Дар Тоҷикистон масъалаи мазкур дар як қатор мақолаҳои илмии олимони соҳа Шарофов Р., Сулаймонӣ С., Шерматов Ҷ., Ҷўраев И., Шосаидов С., ва дигарон мавриди таҳқиқ қарор гирифтаанд. Вазъи имрўзаи соҳаи китобдорӣ, ки вазифаҳои навро дар назди китобдорон мегузорад, ҳаллу фасли мавзўи мазкур айни муддао мебошад. Фаъолияти ҳар як муассиса аз фаъолияти кормандони он вобастагии қавӣ дорад. Зеро китобхона маконест, ки китобдор дар он нақши марказиро мебозад. Рушд ва дурнамои касби китобдорӣ аз тарбияи мутахассисони босавод вобаста мебошад. Агар китобдор дорои дониши баланди касбӣ бошад, аз уҳдаи вазифаҳои хеш беягон мамоният, албатта бо риояи қонуну қоидаҳои мавҷуда мебарояд.
Ҳар як ҷузъиёти касбии худро донистан бо ҳурмату эҳтироми хоса муносибат намудан, ба манфиати мутахассис ва китобхонае, ки дар он фаъолият мекунад мебошад. Вазифаи китобдор ниҳоят пурмашаққат ва масъулятнок аст. Аз нигоҳи аввал китобдорӣ пешаи мушкил нест, аммо аз нигоҳи мутахассис ва китобдороне, ки тамоми нозукиҳои касби худро медонанд, шуѓли китобдорӣ чандон кори сахл нест.
Аз ин рў, китобдоронро лозим меояд, ки барои пешбурди кор ва пайдо намудани мавқеъ бояд пайваста кўшиш ба харҷ диҳанд.
Мутахассиси соҳа Ситораи Абдумуминзода бахшида ба мавзуъи мазкур таваҷҷуҳи бештар зоҳир намуда китоби «Этикаи касбии китобдор»-ро нашр намудааст.
Китоб барои донишҷуён, омўзгорон ва кули мутахассисони риштаи китобдорию итилоърасонӣ хеле муфид хоҳад буд. Шумо метавонед ин дастуро аз Китобхонаи Миллии Тоҷикистон дастрас намоед.
Шариф Наботов
Мутахассиси шуъбаи
хизматрасонии библиографӣ
