646 китоби тозавуруд ба Шуъбаи нигаҳдории китоб

Нашр шуд 2016-07-20 20:14

Дирўз ба шуъбаи нигоҳдории китоби Китобхонаи миллии Тоҷикистон аз шуъбаи такмили адабиёт 646 нусха адабиёти тозанашр бо забонҳои тоҷикӣ, русӣ ва узбекӣ ворид гардид.
Дар байни китобҳои тозаворид «Куллиёти осор»-и шодравон Абдулманнони Насриддин, донишманди маъруфи кишвар иборат аз ҳафт ҷилд низ ҳаст.
Дар куллиёти олими шинохта рисолаҳои илмии ӯ, ки бархе замони дар қайди ҳаёт будани устоди сухан чоп шудаву баъзеи дигар ба тозагӣ нашр шудаанд, ҳамчунин силсилаи мақолаҳову ёддоштҳои маҳфуз дар бойгонии муаллиф гирдоварӣ шуда, бори нахуст бо чунин тарҳ манзури аҳли фазл мегардад.
«Кулиёти осор» - и Абдулманнони Насриддин муҳимтарин таҳқиқоти муаллифро дар мавриди рўдакишиносӣ, маърифати чеҳраҳои мумтози адабу ирфони форсу тоҷик ва камолшиносӣ дар бар гирифта, барои адабиётшиносон ва кулли дилбастагони каломи бадеъ, муҳаққиқон, донишҷўёни мактабҳои олӣ ва ҳамаи адабпажўҳон, муҳиббони маърифат, иродатмандони улуми қуръонӣ, маъниҷўёни адаби форсӣ, забоншиносон ва кулли омўзгорону донишҷўёни риштаи суханшиносӣ, махсусан муҳаққиқони ҷанбаи таҳқиқӣ- таълимӣ дошта, барои кулли алоқамандони илму адаб пешкаш шудааст.
Китоби мазкурро корбарон дар Муассисаи давлатии Китобхонаи миллии Тоҷикистон таҳти рақами инвентарии № 250701-259719 дасрас намуда метавонанд.