Шасти камолоти ҳамкори мо

 Юлчибой Мусоев-ҳамкори мо аз Маркази такмили ихтисоси Китобхонаи миллӣ рӯзи 25-уми июн ба синни мубораки 60 қадам мегузоранд. Як инсони хеле самимиву хоксор, донандаи хуби фаъолияти китобдорӣ, шахси ҳамеша ҳозир ба кумаки ёрону ҳамкорон. Матлаби зер ба қалами собиқадори Китобхонаи миллист, ки Юлчибой Мусоевро солҳои сол мешиносад. Ва чун ин навишта ворид шуд, аз он ҳарфе кам накардем.

ТАШАББУСКОРУ МАСЪУЛИЯТШИНОСИ ФАРҲАНГ

 Дар ҷомеаи имрўзаи тоҷик ба нудрат бо шахсиятҳое рўбарў мегар­дед, ки дар ҷодаи фарҳанг масъулиятро мақсаду мароми хеш қа­рор дода, бо ташаббусҳои некашон мақбули ҳамагону пешравии соҳаи фарҳанг гаштаанд ва пайваста дар ин самт талош­ меварзанд. Яке аз чунин шахсиятҳо Юлчибой Норбоевич Мўсоев мебо­шад, ки солиёни зиёд дар муассисаҳои фарҳангию маърифатӣ ва таълимии кишвари азизамон хизмати босазо анҷом медиҳад. Ў пеш аз ҳама соҳибкасб аст ва дар ҷодаи фарҳанг таълим гириф­та, таҷ­ри­ба андўхтааст. Дар фаъолияти корӣ эҳсоси баланди масъулиятшиносӣ дошта, агар кореро пеш гирад, ба анҷом мерасонад, албатта ба ваъ­да­аш вафо мекунад. Шахси хеле ғамхору корбудкун мебошад ва доимо ба ҳамкоро­наш мадади амалии худро мерасонад.

 Юлчибой Мусоев таълимгирифтаи муассисаҳои таълимии бо­ну­фуз – Омўзишгоҳи ҷумҳуриявии маданӣ-маърифатии воқеъ дар ноҳияи Ленин (ҳоло Коллеҷи фарҳанги ҷумҳуриявии ба номи П. Ҷ. Буйдоқови ноҳияи Рўдакӣ), солҳои 1976-1979 ва Донишкадаи давлатии маданияти шаҳри Москва (ҳоло Донишгоҳи дав­ла­тии фарҳанг ва ҳунари Федератсияи Россия), солҳои 1982-1986 ме­бошад.

 Фаъолияти кории худро ў ба ҳайси методисти Китобхонаи марказии ноҳияи Ленин (1980-1982) оғоз намуда, ҳамзамон ба донишҷўёни Омў­зиш­гоҳи ҷумҳуриявии маданӣ-маърифатӣ аз фанни воситаҳои тех­никии ҳисоббарорӣ дарс гуфтааст. Ў соли 1985-ум дар барқарорсозии иншоотҳои давлатӣ ва хонаҳои хусусии дар натиҷаи заминларза валангоргардидаи шаҳри Қайроқум ва Хуҷанд ихтиёран бо ҳамроҳии отряди “Дўсти халқҳо”-и таъсисдодаи Кумитаи марказии комсомол  хисагузорӣ намудааст. Пас аз таҳсил дар Донишгоҳи дав­латии маданияти шаҳри Москва бо ихтсоси ташкилотчии кор­ҳои маданӣ-маърифатӣ ба ҳайси омўзгори Омўзишгоҳи ҷумҳу­рия­вии маданӣ-маърифатӣ ва ҳамзамон дар вазифаи директори Хонаи фарҳанги совхози “Ҳосилот”-и ноҳияи Ленин (ҳоло Рўдакӣ) фаъолият намудааст.  

 Юлчибой Мусоев фаъолияти ташкилотчигию ташаббускории худро дар вақти фаъолияташ дар Китобхонаи миллии Тоҷи­кис­тон (КМТ) баръало нишон дод ва аз оғози кушодашавии Ки­тобхонаи мазкур сараввал дар шуъбаи маркетинг ва менеҷменти фаъолияти китобдорӣ ва аз аввали соли 2014 дар Маркази так­ми­ли ихтисоси китобдорони КМТ ба ҳайси муовини сардор фаъолият карда истода­аст. Дар давраи фаъолияташ ў ба пуррагӣ ба кор дода шу­да, нозу­ки­ҳои касбро азхуд намуд ва қобилияти худро сайқал дод. Пайваста ба такмил додани кас­баш машғул шуда, бо маводи тозанашри соҳа ошно гашт ва дар натиҷаи он дар матбуоти даврии кишвар ва берун аз он, аз ҷумла 28 мақо­ла дар сомонаи КМТ, 11 мақола дар саҳифаҳои рўз­но­маҳои ҷумҳу­ри­я­вӣ, 4 мақола дар саҳифаҳои  маҷаллаҳои Ассамблеяи китобхонаҳои Авруосиё (БАЕ) ва «Библиотечное дело» инти­шор намуд.

 Дар навбати худ ў дар ҷодаи таҳияи дастурҳои услубӣ саҳм гу­зош­та, таҳти унвони «Созмондиҳии маҳфилҳои адабӣ дар китоб­хона­ҳо» матолиби хонданбоб таҳия ва иттишор на­муд. Дар рафти кораш ў дар ташкил ва баргузории тадорукоти гу­ногуни оммавии Ки­тобхонаи миллии Тоҷикистон, ба монанди шабҳои адабӣ-мусиқӣ бахши­да ба Ҳофизи Шерозӣ таҳти унвони «Шабе бо Ҳофиз», шоҳномахонӣ, шаби эҷодии адибони маъруф Кароматуллоҳи  Мирзо, Аскар Ҳаким ва намоишҳои рас­сомони ҷум­ҳурии «Дида ба дида» ва «Наврўз-2014»  саҳм гузошт, ки дар те­левизи­они Нексвани Европа ба навор гирифта шуд. Вай дар баргузории семинару курсҳо ва семинар-тренингҳои корман­дони ки­тобхонаҳо иштирок ва баромад мекунад, дар конфронсҳо низ ҳис­сагузор аст. Бо ин мақсад ў ба китобхонаҳои минтақаи Кўлоб, вилояти Хатлон ва шаҳру навоҳии тобеи марказ сафарҳои хизма­тӣ анҷом дода, ба китобдорон кўмаку тавсияҳояшро мерасонад.

 Юлчибой Мусоев дар намоиши китоби байналмиллалии «Ру­­сияи муосир чӣ мехонад», ки аз 12 то 16 январи соли 2016 дар КМТ бо ҳамкории Китобхонаи миллии Россия ва Фонди ҳамкории шаҳри Москва  гузашт, бевосита саҳмгузор мебошад. Дар мавриди ободонию кабудизоркунӣ ва дарахту гул шинонидан дар боғу атрофи Китобхонаи миллӣ Юлчибой Мусоев ҳамчун шахси таҷрибадор роҳбалади воқеии кормандон мебошад.

 Ин аст порае аз кору фаъолияти ин марди меҳнатдўсту масъулиятшинос дар як муассисаи фарҳангӣ – Китобхонаи миллии Тоҷикистон.

Маркази такмили ихтисоси КМТ дар муҳлати панҷ соли охири фаъолияташ беш аз 800 нафар шунавандагонро ба курсҳои боз­­омў­зии «Истифодабарии технологияи муосири ит­тилоотӣ», «Биб­­ли­ографияшиносӣ», «Китобхонашиносӣ», «Тасни­фоти  даҳго­наи уни­версалӣ» сафарбар карда, бо «Сер­ти­фи­кат»-­ҳо сарфароз гар­донид. Ширкати фаъолона дар кон­фрон­су семи­нарҳо ва дигар чорабиниҳои илмию маърифатӣ ҳаме­ша мақсад ва ҳадафи кор­мандони Марказ маҳ­суб меёбад. Кормандони Марказ дар ин муддат беш аз 20 семинар- машваратҳои сайёр ва курсҳои боз­омўзии кор­мандони китобхо­на­ҳо­ро дар шаҳру ноҳияҳои Вилояти Мухтори Куҳистони Бадах­шон, Хат­лон, Суғд ва тобеи марказ  баргузор кард.

 Ҳамкории Марказ бо муассисаҳои фар­ҳангӣ ва  китобхонаҳои ИДМ ва хориҷӣ кишвар бо мақсади омўх­тани таҷрибаи пеш­қадами  китобхонаҳо бамаврид буда, зиёда аз 20 нафар корман­до­ни Китобхонаи миллии Тоҷикистон ба Федератсияи Русия, Ҷум­ҳу­рии Федеративии Олмон, Корея, Чин, Қазо­қистон, Белорус ва Эрон фиристода шуданд, ки ин боиси ифтихор аст ва дар ин кор саҳми Юлчибой Мўсоев низ хеле назаррас ме­бошад.

 Ин марди ташаббускор на фақат дар рушди муассисаҳои фар­ҳангӣ, балки дар бунёди иншоотҳои фарҳангию саноатӣ ва маъ­мурию истиқоматии мамлакат саҳми муносиб гузоштааст. Вай солҳои 1991-2012 аз мутахассиси одӣ то ба ҳайси директори генералии Ширкати Тоҷиксохтмони «Манбаъ» (баъдан ҶСК «Захи­ра»)-и Вазорати сохтмони Ҷумҳурии Тоҷикистон барои таъмино­ти ма­со­леҳи сохтмонии муассисаву ташкилотҳои сохтмонии шаҳ­ру ноҳия­ҳои тобеи марказ ва вилоятҳои Хатлону Суғд адои хиз­мат карда­аст.

 Ў барои корҳои беназираш дар тарбияи мутахассисони соҳаи китобдорӣ аз ҷониби роҳбарияти Китобхонаи миллии Тоҷикистон бо Иифтихорномаю Сипоснома, Сипосномаҳои Китобхо­наи дав­ла­тии Федератсияи Русия ва Фонди маърифатию фарҳан­гии «Со­дей­ствие» қадр карда шудааст.

 Ба истиқболи Рўзи китоб соли 2018-ум бошад Юлчибой Мўсоев бо нишони сарисинагии «Аълочии фарҳаги Ҷумҳурии Тоҷикистон» сарфароз гардида шуд.

 Ўдар байни коллективи кормандони Маркази такмили ихтисоси КМТ ва дигар муассисаҳои фарҳангӣ обурў ва эътибори беҳамто дош­та, ҳамчун шахси ташаббускору ташкилотчӣ ва масъулият­ши­нос ном бароварда аст, зеро ў дар ҳама чорабиниҳои КМТва берун аз он фаъо­лона ҳисса мегузораду барои ҳамкасбони ҷавонаш мураббӣ мебо­шад. Дар ин ҷода ба вай комёбиҳои беназир орзумандем.

 Қобилияти ташаббускорӣ ва масъулиятшиносиро дар ҷодаи фарҳанг фақат шахсоне ба монанди Юлчибой Норбоевич Мўсоев роҳандозӣ карда метавонанд, ки худ дониши кофии касбӣ, маърифати баланди инсонӣ ва фарҳанги волои худодод доранду касбу корашонро дўст медоранд ва ба ҳамкасбон мададгору кўмакра­со­нанд. Бигзор теъдоди чунин шахсон дар муассисаҳои фарҳангӣ – китобхонаҳои мамлакат зиёд гардад ва боиси комёбиҳо гардад.

 Ҷурабой Раҷабов, собиқадори КМТ,

 Аълочии фарҳанг, маориф ва матбуоти

 Ҷумхурии Тоҷикистон.