Ғанӣ Ҷӯразода- адиби маъруф дар синни 85-солагӣ аз олам даргузашт
Дирӯз, 28-уми феврал Ғанӣ Ҷӯразода, адиби маъруф ва яке аз муваффақтарин адибони кӯдакнависи кишвар дар синни 85-солагӣ баъди беморӣ дар манзилаш воқеъ дар шаҳри Душанбе аз олам даргузашт. Дар ин бора духтари адиби шинохта Фирӯза Аҳрорӣ хабар дод. Дар муаррифиномаи Иттифоқи нависандагони Тоҷикистон мехонем:
ҒАНӢ ҶӮРАЗОДА 9 январи соли 1936 дар маҳаллаи Мирамони ҷамоати Пӯлодони ноҳияи Конибодоми вилояти Суғд таваллуд ёфтааст. Баъд аз хатми мактаби миёнаи №25 (1956) таҳсилро дар факултаи филологияи тоҷики Донишгоҳи давлатии Тоҷикистон идома додааст. Пас аз хатми донишгоҳ, солҳои 1961-1993, дар рӯзномаҳои «Комсомолии Тоҷикистон», «Ҷумҳурият», «Садои мардум» ва маҷаллаи «Коммунисти Тоҷикистон» дар вазифаҳои гуногун кор кардааст.
Солҳои 1993- 2006 тарҷумон-муҳаррири Дастгоҳи Маҷлиси намояндагони Маҷлиси Олии Ҷумҳурии Тоҷикистон буд.
Нахустин шеъру ҳикояҳояш солҳои 1955- 1957 ба табъ расидаанд.
Асарҳояш ба забонҳои русӣ, узбакӣ ва ғайра тарҷума ва чоп шудаанд.
Китоби ҳикоя ва қиссаҳояш «Кулоҳи падар» (1988), «Захми дил» (2000), «Қисмат» (2000),«Ҳушёраки ман, ту куҷоӣ?» (2004), «Афсонаи модаркалонам» (2005), «Бозгашти хотира» (2005), «Очаҷон, аз ман маранҷ!» (2006),«Рахсеб» (2008), «Шишаи бишкаста» (2013),«Панди бобо» (2014) ва китоби публитсистикаи ӯ «Қатраҳо дарё шаванд» (2001) аз ҷониби нашрияҳои гуногун ба чоп расидаанд.
Асарҳои алоҳидаи адибони маъруф Р. Такур, Н.Носов, Н.Тихонов, Б.Житков, В.Катаев, Л.Маҳмудов ва дигаронро ба забони тоҷикӣ гардонидааст.
Корманди шоистаи маданияти Тоҷикистон, дорандаи медали «Ветерани меҳнат», Ифтихорномаи Президиуми Совети Олии РСС Тоҷикистон ва дигар мукофотҳост.
Аз соли 1962 узви Иттифоқи рӯзноманигорон, аз соли 2000 узви Иттифоқи нависандагони Тоҷикистон аст.
Роҳбарият ва кормандони Китобхонаи миллӣ ба муовини сардори Шуъбаи кӯдакон ва наврасон Фирӯза Аҳрорӣ ҷиҳати даргузашти падараш
ҒАНӢ ҶӮРАЗОДА
изҳори тасаллият мекунад ва ба марҳум аз даргоҳи Холиқи якто Фирдавси барин ва ба бозмондагонаш сабри ҷамил хоҳон аст.
Мо аз Худоем ва ба сӯи Ӯ бармегардем!
Дар бора Ғанӣ Ҷӯразода боз ин матолибро ҳам метавонед бихонед:
