42 дарахти магнолияи Китобхонаи миллӣ
Боз 42 адад дарахти хушнамуди магнолия саҳни Китобхонаи миллиро оро дод ва бо ин шумори дарахтони танҳо имсол шинондашуда аз 900 гузашт.
Аввали ҳафтаи равон як маъракаи гулшинонӣ ва дарахтшинонӣ дар Китобхонаи миллӣ роҳандозӣ шуд. Ин бор 42 дарахти хушнамуди магнолия оварда ва шинонда шуд. Ин дарахтон дар паҳлуи дарахтони дигари ороишӣ, ки ҳамагӣ ду ҳафта пештар шинонда шуда буданд, ҷой гирифтанд. Аз аввали сол то ба ин дам дар ҳота ва саҳни Китобхонаи миллӣ бештар аз 900 дарахти сояафкан ва ороишӣ шинонда шуд.
Дарахтон ва гулҳо ба ҳусни ин бинои зебо ҳусни тоза зам карданд. Бонувони Китобхонаи миллӣ чанд рӯз пештар, қабл аз боришоти ахир ба ҷойи гулҳои пажмурдашуда гулҳои тару тоза шинонданд ва ин сабабгори боз ҳам зебову дилкаш шудани саҳни Китобхона гашт.
Роҳбарияти Китобхонаи миллӣ дар канори хизматрасонӣ ба хонандагон ба ободии атрофи бино диққати ҷиддӣ медиҳанд. Зарфи ду моҳи охир маҳз аз ҳамин гуна талошҳо симои Китобхонаи миллӣ дигаргун шуд, сабзтар, дилкаштар ва зеботар гардид.
Ва як маълумоти кутоҳ дар бораи магнолия
Ин дарахт барои Тоҷикистон то солҳои ахир ноошно буд, вале ҳоло онро метавон дар кӯчаву хиёбонҳо пойтахт ва дигар шаҳрҳои бузурги кишвар дид. Магнолияи шукуфон як манзараи фаромӯшношуданист. Ҳатто дар Русия он нав аст ва магнолияи гулбузургро (Magnolia grandiflora) метавон дар соҳили Баҳри Сиёҳ дид. Онро ба ин минтақа аз Амрикои Шимолӣ овардаанд. Ин дарахт то 40 метр қад мекашад ва бо гулҳои зардтоб ва ё сафеди калон-калон (баъзан қутраш то ним метр) пӯшида шудааст. Меваҳояш малоҳату фатонати бештар медиҳанд. Онҳо ба ҷалғӯзаҳое монанданд ва ба назар мерасад дар риштаҳои хеле борик бо тухмӣ овезонанд. Магнолия танҳо зебову ҷаззоб нест, балки фоидаовар низ мебошад. Аз баргҳои он дору бар зидди фишори баланди хун тайёр мекунанд.
МАГНОЛИЯ ВА ГАМБӮСКҲО
Шабонгаҳон андаруни гулҳои пӯшидаи магнолӣ метавон садои гамбускҳоеро шунид, ки рустаниро гардолуд мекунанд. Барои онҳо рустани “тарабхонаи” ҳақиқиро мемонад, ки дар он гард ва накҳати хуши гулро истеъмол мекунанд. Шабона ин “тарабхона” гамбускҳоро то субҳ нигоҳ медорад, даруни гули ғунчаи баста шояд 10 дараҷа гармтар аз берун бошад. Гамбӯскҳо бояд аз магнолия миннатдор бошанд.
Аммо барои он ки худгардолудшавӣ рух надиҳад, гардак ва гардгираки модина дар як гул дар вақтҳои гуногун мепазанд. Гардолудкунии гамбӯскҳо хеле қадимӣ нисбат ба гардолудкунии шабпаракҳо, занбӯрҳои асал ва дигар ҳашаротҳост. Ва худи оилаи магнолиҳо дар миёни рустаниҳои гулдор аз ҷумлаи хеле қадимиҳост.
